ڕوانگەی عێراقی بۆ مافەكانی مرۆڤ ئەمڕۆ چوارشەم، ئاماری توندوتیژیی خێزانی لە سەرانسەری عێراق بڵاو بووەوە و لە ماوەی ساڵی ڕابردوودا، 36 هەزار و 289 حاڵەتی توندوتیژیی خێزانی تۆمار كراون، لەو ڕێژەیەیشدا پێنج هەزار و 918 ژن لە پیاوەكانیان داوە و توندوتیژییان بەرانبەر ئەنجام داون.
بەگوێرەی ڕاگەیەنراوەكە لە سەرتاسەری عێراق لە 2025، 19 هەزار و 587 پیاو توندوتیژییان بەرانبەر ژنەكانیان ئەنجام داوە، لە بەرانبەردا تەنیا پێنج هەزار و 918 ژن توندوتیژییان بەرانبەر پیاوەكانیان كردووە.
هاوكات لە توندوتیژی لە دژی دایك و باوك كە دیاردەیەكی زۆر ناشارستانییە، سێ هەزار و 112 كوڕ توندوتیژییان بەرانبەر دایك و باوكیان ئەنجام داوە، 531 كچیش توندوتیژانە مامەڵەیان لەگەڵ دایك و باوكیان كردووە.
لەبارەی توندوتیژیی خوشك و برا، هەزار و 583 برا توندوتیژییان بەرانبەر خوشكەكانیان ئەنجام داوە، لە بەرانبەردا 725 خوشك توندوتیژانە مامەڵەیان لەگەڵ براكانیان كردووە.
توندوتیژیی دایك و باوك بۆ سەر منداڵەكانیان، هەزار و 282 حاڵەتی توندوتیژیی دایك و باوك لە دژی كوڕەكانیان ئەنجام دراوە، 559 كچیش لەلایەن دایك و باوكیانەوە توندوتیژییان بەرانبەر كراوە.
Leave a Reply