ئێوارەی ئەمڕۆ شەموو بارەگەی حزبی تەقەدووم لە شارۆكەی دووبز لە باكوری رۆژئاوای كەركووك لە لایەن هێزە تەناهییەكانەوە داخرا، ئەوەش دوای ئەوەی پاسەوانەكانی كاندیدێكی ئەو حزبە هەڵیان كوتایە سەر ماڵی هاووڵاتییەك و تەقەیان لێ كرد.
بەپێی سەرچاوە تەناهییەكان ئەمڕۆ ژمارەیەك لە پاسەوانەكانی موهەیمن حەمدانی كاندیدی دەرچووی حزبی تەقەدوم چوونە سەر ماڵی هاووڵاتییەك لە شارۆكەی دبس لە كەركووك و دەستدرێژییان كردە سەر دانیشتووانی ماڵەكە، ئەوەش ئاڵۆزی لەو شارۆكەیە دروست كرد و وای كرد هێزە تەناهییەكان گەمارۆی ناوچەكە بدەن.
دوای رووداوەكە فەرمانی گرتن بۆ پاسەوانێكی حەمدانی دەرچوو و سوپای عێراق گەمارۆی ماڵی حەمدانیان دا و داوای رادەستكردنی پاسەوانەكەیان كردووە، وەك لە سۆشیال میدیاش بڵاو بووەتەوە حەمدانی خۆی لە هێرشكردنە سەر ماڵی هاووڵاتییەكە بەشدار بووە و هۆكارەكەش لەسەر كۆمێنت بووە.
Leave a Reply