د چوارچوڤێ بزاڤێن پێشڤەبرن و بەرفرەهکرن و گەشەپێدانا کەرتی گەشتیاری ل هەرێما کوردستانێ، ئەڤرۆ ل سەر بانگهێشتا ئارین بارزانی، ل هەولێرێ کومبونەک دناڤبەرا ئارین بارزانی و وەبەرهێنەر هەرمان سدقی هاتە ئەنجامدان.
گەلێ شێرانە وەک مودێلەکا سەرکەفتی
هەرمان سدقی، وەبەرهێنەر و خودانێ کومەلگەها گەشتیاری یا ئاڤا شین ل گەلیێ شێرانە دیارکر کو ئارمانجا سەرەکی یا کومبونێ ئەو بوو کو ئەزموونا سەرکەفتی یا گەلێ شێرانە د بیاڤێ گەشتیاری دا بهێتە شرۆڤەکرن و ڤەگوهاستن بۆ دەڤەرێن دی یێن پارێزگەها دهۆکێ و هەرێما کوردستانێ و بۆ “وشە” گوت: دکومبونێ دا باس ل پلانێن ستراتیژی یێن گەلیێ شێرانە هاتەکرن، کو بوویە نموونەکا بەرچاڤ د رادکێشانا گەشتیاران دا. دێ بزاڤ هێنەکرن کو ئەزمونا گەلیێ شێرانە بو دهۆک و ئاکرێ، زاخۆ و دەڤەرێن دی بهێتە ڤەگوهاستن.
هەماهەنگی ل گەل وەبەرهێنەرێن بیانی
هەرمانی دیارکر ژی کو دکومبونێ دا باس ل رولێ وەبەرهێنەرێن بیانی مل ب ملێ وەبەرهێنەرێن ناڤخۆ هاتەکرن و گوتژی: د پلانا حکومەتا هەرێما کوردستانێ دایە کو ددەما 10 سالێن بهێت دا، ژمارا گەشتیاران بگەهینیت 20 ملیون گەشتیاران د سالەکێ دا، بۆ گەهشتنا ڤی ئارمانجی پێدڤیە گرنگییەکا زێدەتر ب کەرتی تایبەت بهێتەدان، ژبەر کو رولێ وی د پێشخستن و دروستکرنا ژێرخانێ دا یێ چارەنڤیسازە.
پاڵپشتییا ئارین بارزانی بۆ کەرتێ گەشتیاری
وەبەرهێنەر و خودانێ کومەلگەها گەشتیاری یا گەلیێ شێرانە د درێژاهیا ئاخفتنێن خودا دیارکر ژی کو گرنگیدانا ئارین بارزانی، ب کەرتی گەشتیاری، نیشانەکا روونە کو گەشتیاری دێ ببیتە یەک ژ ستونێن سەرەکی یێ ئابووریا کوردستانێ و زێدەتر گوت، بانگهێشتکرنا وەبەرهێنەران و ڤەکرنا دەرفەتان بۆ دانوستاندن، گاڤەکا گرنگە بەر ب جێبەجێکرنا پلانێن حکومەتێ و پێشڤەبرنا کەرتێ گەشتیاری ل دەڤەرێ دهێتەدان.
هەرمان سدقی: دەستێ سەرەکی یێ سەرکەفتنا گەلێ شێرانە
هەرمان سدقی، کار و پروژە و وەبەرهێنانێن زۆر دبیاڤێ گەشتیاری دا ل گەلێ شێرانە کرینە، دەڤەر ژ دەڤەرەکا سادە گوهارتیە بۆ جهەکی سەرنجراکێش یێ گەشتیاری.
Leave a Reply