ئەیوب ئەورەحمان
نیشتیمان بۆ من تەنها ڕووبەرێک زەوی و جوگرافیایەک نییە کە سنوورەکانی کێشرابێت، بەڵکو برینێکی خوێنبەری کراوەیە لە قوڵایی ڕۆحمدا، برینێک کە هەرگیز زەمەن ناتوانێت ساڕێژی بکات. کاتێک لێرەوە، لەم تاریکییەی غوربەت و لە پشت دیوارە ساردەکانی تەنیاییەوە سەیری نیشتیمان دەکەم، هەست دەکەم هەموو دەمارەکانی لەشم دەچنەوە سەر ئەو خاکە، کەچی ناتوانم بگەڕێمەوە و جارێکی تر بۆنی ئەو خۆڵە بکەم کە لەگەڵ هەناسەمدا تێکەڵ بووە.
بەڵام ئەوەی کە ئەم ئازارەی دووری و غوربەتم بۆ هەزار هێندە دەکات و وەک خەنجەرێک دڵم دەگوشێت، تەنها دورییەکە نییە، بەڵکو بینینی دیمەنی دڵتەزێنی حاڵ و گوزەرانی خەڵکە داماو و بەش مەینەتەکەمە. دەبینم چۆن ڕۆژ بە ڕۆژ ژیانیان بەرەو هەڵدێر و وێرانتر دەڕوات لەژێر سایەی حوکمڕانی و دەسەڵاتێکدا کە هیچ بەزەییەکیان نییە.
یەکێتی و پارتی، ئەم دوو هێزەی کە ساڵانێکە وەک مۆتەکە بەسەر سنگ و هەناسەی ئەم نیشتیمانەوەن، وڵاتەکەیان کردووە بە دوو بەشەوە: دۆزەخێکی سوتاو بۆ هاوڵاتیان، و بەهەشتێکی خەیاڵی بۆ خۆیان و کوڕ و کچ و بنەماڵەکانیان. ئەوان تەنها پارەیان نەدزیوە، ئەوان “خەندە”یان لەسەر لێوی منداڵان و “ئومێد”یان لە دڵی گەنجان دزیوە. ساڵانێکە خوێنی ئەم گەلە دەمژن و هیوا و خەونی گەنجانیان لە گۆڕ ناوە، وڵاتیان کردووە بە زیندانێکی گەورە کە تێیدا دادپەروەری تەنها وشەیەکە لە کتێبەکاندا و بوونی نییە.
سەروەت و سامانی ژێرزەوی و سەرزەوییان بۆ خۆیان قۆرخ کردووە، کۆشکەکانیان لەسەر ئێسقان و فرمێسکی خەڵک بونیاد ناوە، لەکاتێکدا باوکێک شەرمەزاری دەستی بەتاڵیەتی لەبەردەم منداڵەکەیدا، گەنجێک بڕوانامەکەی دەسوتێنێت لە بێ ئیشیدا، و نەخۆشێک دەمرێت لە بێ دەرمانی و بێ خزمەتگوزاریدا. تاکە شتێک کە ئەم دەسەڵاتە بە هەردوو باڵەکەیەوە (سەوز و زەرد) پێشکەشی خەڵکیان کردووە، تەنها بێئومێدی، هەژاری، شکاندنی شکۆ و ماڵوێرانییە.
منیش لێرەوە، بە دڵێکی پڕ لە حەسرەت و چاوێکی پڕ لە فرمێسکەوە تەنها دەتوانم بۆتان بنووسم: ئێمە دوو جەستەی یەک ڕۆحین کە ئازار دەچێژین؛ ئێوە لە ناوەوە لەناو ئاگری زوڵمدا دەسوتێن، و ئێمەش لە دەرەوە لەناو سەهۆڵبەندانی حەسرەتدا دەتوێینەوە. دڵی من لای ئێوەیە، لای ئەو نیشتیمانەی کە هی ئێمەیە بەڵام ئەوان داگیريان کردووە.»
Leave a Reply