ئەمڕۆ چوارشەم 12ی ئابی 2026، شەپۆلێکی گەرما عێراقی گرتووەتەوە و لە هەشت پارێزگادا پلەکانی گەرما 50 پلەی سەدی و زیاتریان تۆمار کرد، بە جۆرێک لە بەسرە گەیشتە 52 پلە. بەپێی داتاکان، چەند ناوچەیەکی عێراق لە ڕیزی گەرمترین 15 شوێنی جیهاندا بوون، و پێشبینی دەکرێت گەرماکە بەردەوام بێت تا دوای ناوەڕاستی ئەم مانگە.
بەپێی خشتەیەکی دەستەی کەشناسی، لە هەشت پارێزگادا پلەکانی گەرما 50 پلەیان تێپەڕاندووە، بەم شێوەیە: بەسرە 52، میسان و زیقار و موسەننا 51، و دیوانیە و نەجەف و واست و دیالە 50 پلەی سەدی. لە پارێزگاکانی تریشدا پلەکانی گەرما لە نێوان 41 پلە لە سلێمانی و دهۆک و 49 پلە لە بەغدا و بابلدا بوون.
داتاکانی چاودێریی کەشوهەوای جیهانی دەریانخستووە، فڕۆکەخانەی نێودەوڵەتیی بەسرە، ناحیەی کوت حەی، ڕوفاعی، ناسریە و سەماوە، لە لیستی گەرمترین 15 پلەی گەرمادا بوون لەسەر ئاستی جیهان لە ماوەی 24 سەعاتی ڕابردوودا.
لەلایەکی ترەوە، سادق عەتیە، پێشبینیکاری کەشوهەوا، پێشبینیی بەردەوامبوونی کەشوهەوای زۆر گەرم و ماندووکەری کرد لە بەغدا بۆ ئەمڕۆ و سبەی، بەهۆی بەردەوامیی بای ساکن یان سووکەوە. هەروەها پێشبینیی بەردەوامبوونی بەرزیی ڕێژەی پیسکەرەکانی هەوا لە کاتەکانی بەیانیدا کرد، بەهۆی لاوازیی جووڵەی هەواوە.
Leave a Reply