پارێزگەها دهوکێ زورترین رێژا بەرهەمێ تری ل هەرێما کوردستانێ هەیە، ژبەر بارینا بارانێن باش و ددەمێ خۆ دا، ئەڤ سالە نێزیکێ 80 هزار تەنێن تری هاتیە بەرهەمئینان کو زور پترە ژ سالا بوری.
ئەحمەد جەمیل، رێڤەبەرێ گشتی یێ چاندنێ ل پارێزگەها دهۆکێ بۆ “وشە” گوت، پارێزگەها دهۆکێ یا ناڤدارە بەرهەمێ ناڤخۆ، ب پشتەڤانیا حکۆمەتا هەرێما کوردستانێ سالانە ئەڤ بەرهەمە د زێدەبوونێ دانە، بەرهەمێ تری ژی ئێکە ژ وان بەرهەمان و سالانە نێزیکی 20 هزار و 118 دوونەمێن ئەردی ژلایێ جوتیارێن پارێزگەها دهۆکێ دهێنە چاندن.
زێدەتر گوت، ئەڤ سالە بەرهەمێ تری زێدەبوویە و پێشبینی دهێتەکرن 80 هزار تەن بهێنە بەرهەمئینان، سالا بوری نێزیکێ 60 هزار تەنان هاتبوونە بەرهەمئینان، ئانکو ئەڤ سالە 20 هزار تەن بەرهەمێ تری زێدەبوویە.
ناڤبری دیارکر ژی کو ل گەل گەهشتنا بەرهەمێ ناڤخۆ یێ تری، وەکو پشتەڤانی بۆ جوتیاران، حکومەتا هەرێما کوردستانێ بریارێ دەت بەرهەمێ تری بیانی بهێتە قەدەغەکرن بو ناڤا بازاری دا و گوتژی، رۆژانە بەرهەمێ تریێ خومالیێ پارێزگەها دهۆکێ بۆ پارێزگەهێن دی یێن عێراقێ دهێنە رەوانەکرن، داکو جوتیارێ مە مفادار بیت و بشێت بازاری پەیدا بکەت.
ل سنورێ پارێزگەها دهوکێ 125 جۆرێن تری هەنە، ب مەرەما پەیداکرنا بازاری و نیشاندنا بەرهەمێ تری، سالانە ب پشتەڤانیا حکۆومەتا هەرێما کوردستانێ فێستیڤالەکا تایبەت ب بەرهەمێ تری و هنگڤینی دهێتە ڤەکرن و پتری 50 جورێن تری و چەند جورێن هنگڤینێ سروشتی و خۆمالی یێن گوند و چیایێن کوردستانێ ژی تێدا دهێنە نیشاندان، نوکەدا بەرهەڤی بۆ ڤێ فێستیڤالێ یێ دهێنەکرن و بریارە دوماهیا ڤێ مەهێ بهێتە سازکرن.
Leave a Reply