وەزارەتی پێوەندییەكانی عێراق بڕیاری دا بە قەدەغەكردنی یاریی لودۆ، ئەوەش بەهۆی سستبوونی پێوەندییەكانی نێوان ژن و پیاو. بۆ ئەو بڕیارەش ئەو وەزارەتە دەڵێت، بۆ پاراستنی خێزانە عێراقییەكان لە تاوانە ئەلیكترۆنییەكان و تێكدانی رەوشتی كۆمەڵایەتی.
ئەمڕۆ سێشەم نۆی كانوونی یەكەم، وەزارەتی پێوەندییەكانی عێراق رای گەیاند، بەپێی ئەو دەسەڵاتانەی پێمان دراوە و لە جێبەجێكردنی بڕیارەكانی دادگای باڵای فیدراڵی، بڕیار دراوە یاریی لودۆ رابگیرێت.
دەشڵێت ئەو بڕیارە بۆ پاراستنی خێزانی عێراقییە لە زیادبوونی مەترسییەكانی و كاریگەرییە نەرێنییەكانی لەسەر پەیكەری كۆمەڵایەتی، بەو پێیەی بووەتە سەرچاوەی ناكۆكی لەناو زۆر لە خێزانەكان و نێوان هاوسەران، لە ئەنجامی سیستمی گرەوكردن كە پاڵیان پێوە دەنێت بەرەو كردەوەی مەترسیدار و قبووڵنەكراو.
ئاماژە بەوەش كراوە كە بڕیاری بلۆككردن، دوای چاودێریكردن و بەدواداچوونی بەردەوامی كۆمەڵێك سەرپێچی و كێشە دێت كە بەهۆی ئەم یارییەوە دروست دەبن، بەشێكیان لە ڕێگەی چاتی تایبەتەوەیە كە ڕێگە بە پێوەندیی ڕاستەوخۆ دەدات، لە ژینگەیەكدا كە ئامادەكاری دەكرێت بۆ قۆستنەوەی سێكسی و تاوانی ئەلیكترۆنی.
Leave a Reply