جێگر بۆرهان معمد
لە یەکێک لە سەیرترین شەوەکانی مێژووی سیاسیی عێراقدا، ناوچەی سەوز، ئەو قەڵا پارێزراوەی کە هەمیشە وەک پەناگەیەکی ئارام بۆ بەرپرسان و دیپلۆماتکاران سەیر دەکرا، لەناکاو بووە گۆڕەپانی ئۆپەراسیۆنێکی سەربازیی گەورە. بە بڕیاری سەرۆکوەزیران عەلی فالح کازمی زەیدی و بە بەکارهێنانی هێزەکانی دژە-تیرۆر و زرێپۆش، ٤٧ بەرپرس، کە لە نێویاندا پەرلەمانتار، بریکاری وەزارەت، و سەرکردەی حیزبی هەن، لە یەک شەودا و لە کاتی خەودا دەستگیر کران. ئەم شانۆگەرییە دراماتیکییە، کە تێیدا پارێزبەندیی پەرلەمانی لە چەندین یاسادانەر سەندرایەوە پێش دەستگیرکردنیان ، لەلایەن حکومەتەوە وەک “شۆکێکی گەورەی دژە-گەندەڵی” دەفرۆشرێتەوە، بەڵام ئەگەر بە چاوی شیکارکارانی کەناڵەکانی وەک بی بی سی و سی ئێن ئێن لێی بڕوانین، ئەمە زیاتر لە ڕاوکردنێکی سیاسی و پاکتاوکردنی حیسابات دەچێت تا چاکسازییەکی ڕاستەقینە. کاتێک حکومەت دان بەوەدا دەنێت کە زۆربەی ئەم دەستگیرکردنانە تەنها لەسەر بنەمای دانپیادانانەکانی عەدنان جومەیلی، بریکاری پێشووی وەزارەتی نەوت بووە ، پرسیارە گەورەکە ئەوەیە: ئایا دەزگاکانی چاودێریی دەوڵەت و دەستەی دەسپاکی ئەوەندە ئیفلیجن کە تەنها لە ڕێگەی دانپیادانانی دزێکەوە دەتوانن دزەکانی تر بدۆزنەوە؟ ئەمە داهێنان نییە، بەڵکو دانپیادانانێکی مەترسیدارە بەوەی کە سیستەمی دامەزراوەیی عێراق بە تەواوی داڕماوە و ناتوانێت هیچ تاوانێک بەبێ بوونی “سیخوڕیی ناوخۆیی” حیزبەکان ئاشکرا بکات.
جێگەی پێکەنینە کە لەناو لیستی دەستگیرکراوەکاندا ناوی کەسایەتییەکانی وەک عەلی مەعارج بەهادلی (بریکاری وەزارەتی نەوت) و موسەننا سامەڕائی (سەرۆکی هاوپەیمانیی عەزم) هەیە، کە پێشتر خۆیان وەک پارێزەری مافی گەل و سەروەریی یاسا دەناساند. کاتێک دەسەڵات بە ٤٧ کەلەپچەوە دێتە سەر شاشەکان، پێی وایە متمانەی گشتی کڕیوەتەوە، بەڵام لە ڕاستیدا تەنها ئەوەمان پێ دەڵێت کە گەندەڵی لەم وڵاتەدا کارێکی شەخسی نییە، بەڵکو تۆڕێکی جاڵجاڵۆکەیییە کە هەموو جومگەکانی حوکمڕانیی داگیرکردووە و تەنانەت لەناو پەیمانگای یاسادانانیشدا یاسادانەرەکان خۆیان بازرگانی بە دەنگەکانیانەوە دەکەن. ئایا دەسەڵاتێک کە ناچارە بە زرێپۆش بچێتە ناو سەلامەتترین ناوچەی پایتەختەکەیەوە بۆ گرتنی کارمەندەکانی خۆی، دەتوانێت بانگەشەی سەقامگیری و دامەزراوەییبوون بکات؟ تا ئەو کاتەی ئەم پرۆسەیە لە دەستگیرکردنی چەند ئەکتەرێکەوە نەگۆڕێت بۆ گۆڕینی تەواوەتیی ئەو سیستەمە بانکی و کارگێڕییەی کە ڕێگەی بە دزینی ملیاران دینار داوە، ئەم ٤٧ کەلەپچەیە تەنها دەبنە ڕیکلامێکی کورتخایەن بۆ کابینەکەی زەیدی، و چەند مانگێکی تر دەبینین کە ٤٧ کورسییە بەتاڵەکەیان لەلایەن ٤٧ کەسی ترەوە پڕ دەکرێنەوە کە ڕەنگە زۆر باشتر فێری شاردنەوەی پارەکان بووبن!
Leave a Reply