بەهۆی بارانەوە زیانێكی زۆر بەشەقام و پرد لە هەرێمی كوردستان گەیشتووە، بەرەبەیانیی ئەمڕۆ لافاو لە سیدەكان دوو پردی رووخاند و قوتابخانەیەكیش ئاو چووەتە ناوی.
ئەمساڵ رێژەی بارانبارین لە هەرێمی كوردستان زۆر بوو، بەو هۆیەوە لە هەموو شار و شارۆچكە و شارەدێەكان زیان بەر شەقام و پرد گەیشتووە و بەشی زۆریان پر بوون لە تاسە و چاڵ و چۆڵی.
لە سنووری سلێمانی بەپێی ئامارەكانی شارەوانی، زیان بەر چەندان پرد و كەوتووە كە پێویستیان بەنۆژەنكردنەوە هەیە، زیانێكی زۆر بەر قیری شەقامەكان كەوتووە كە بۆ پڕكردنەوە و چاككردنەوەیان دەبێت وەزارەتی شارەوانی بڕیاری بەپەلە بدات.
لەمبارەیەوە بەڕێوەبەری گشتیی رێگەوبانی سلێمانی رایدەگەیێنێت، زیانە کەڵەکەبووەکان گەیشتوونەتە 10 ملیار دینار و پلانێکی نوێش بۆ نۆژەنکردنەوەی 49 پڕۆژە بە گوژمەی 19 ملیار دینار پەسندکراوە.
لە هەولێریش زیانەكان كەمتر نین لە سلێمانی و دهۆكیش زۆرترین بارانی تێدا باریوە و بەگوتەی بەرپرسانی شارەوانی، زیانەكانی شەقام و پردی هاتوچۆی گوندەكان بەهۆی بارانەوە گەلێكن.
شەوی رابردوو لافاو لە سنووری سیدەكان هەبووە و بەگوتەی قایمقامی شارۆچكەكە، زەرەری زۆری مادی هەبووە، بەڵام هیچ زیانێكی گیانی نەبووە، زیانی گەورەش بەر كەرتی رێگەوبان كەوتووە.
وەك باسی دەكات، لافاو دوو پردی رووخاندووە و هەریەك لە گوندەكانی (نزاریا، قۆڕان، هۆرە، سنینان، پیرەكە)، ئاستەنگی هاتوچۆیان بۆ دروست بووە.
Leave a Reply