ده‌زگای رادیۆ و ته‌له‌ڤزیۆنی ئیسرائیل له زاری چه‌ند سه‌رچاوه‌یه‌كی ته‌ناهیی وڵاته‌كه رای گه‌یاندووه، ئێران خه‌ریكه به خێرایی توانا سه‌ربازییه‌كانی خۆی په‌ره پێ ده‌دات و هه‌ر ئه‌وه‌ش لای ئیسرائیل نیگه‌رانی لێ كه‌وتووه‌ته‌وه.
به‌گوێره‌ی جه‌زیره، ئێران ئه‌و ترسه‌ی هه‌یه ئیسرائیل جارێكی تر هێرش بكاته‌وه سه‌ری و ئاسمانی وڵاته‌كه‌ی ببه‌زێنێت، بۆیه هه‌موو هه‌وڵێكی خۆی به‌گه‌ڕ خستووه بۆ ئه‌وه‌ی بتوانێت رووبه‌ڕووی هێرشی داهاتووی ئیسرائیل ببێته‌وه.
ماوه‌ی رابردوو عه‌باس عێراقچی وه‌زیری ده‌ره‌وه‌ی ئێران، له وه‌ڵامی پرسیاری ئه‌وه‌ی تا چ ئاستێك خۆتان بۆ ئه‌گه‌ری هێرشی ئیسرائیل بۆ سه‌ر وڵاته‌كه‌تان ئاماده كردووه، گوتی ”ئێمه زیاتر له جه‌نگی رابردوو ئاماده‌ین”
دواتر پرسیاری ئه‌وه‌ی لێ كرا روونكردنه‌وه بدات له‌وه‌ی له چ روویه‌كه‌وه ئاماده‌ن، ئه‌ویش گوتی مووشه‌كه‌كانیان چ له رووی جۆری و چ له رووی زۆری له دۆخێكی زۆر باشتردان.
جێی باسه له 13ی حوزه‌یرانی ئه‌مساڵ ئیسرائیل به پاساوی هه‌وڵدانی ئێران بۆ به‌رهه‌مهێنانی چه‌كی ئه‌تۆمی، هێرشی كرده سه‌ر وڵاته‌كه و له ماوه‌یه‌كی كه‌مدا وێڕای كوشتنی ده‌یان فه‌رمانده‌ی باڵای سه‌ربازیی و زانای ئه‌تۆمی، ئاسمانی وڵاته‌كه‌ی به ته‌واوی كۆنترۆڵ كرد.
ئیسرائیل زیانێكی زۆری به ناوه‌نده ئه‌تۆمییه‌كانی ئێران و ناوه‌نده مووشه‌كی و سه‌ربازییه‌كان گه‌یاند، له به‌رانبه‌ردا ئێرانیش زیاتر له 500 مووشه‌كی ئاراسته‌ی ئیسرائیل كرد كه له‌و ژماره‌یه 5%یان هێڵی به‌رگریی ئاسمانیی ئیسرائیلیان بڕی و كه‌وتنه خواره‌وه و ژماره‌یه‌كیان زیانی مادییان به ئیسرائیل گه‌یاند.
جه‌نگه‌كه 12 رۆژی خایاند و دوو رۆژ به‌ر له ته‌واوبوونی، ئه‌مه‌ریكا به فڕۆكه‌ی B2 هێرشی كرده سه‌ر سێ وێستگه‌ی سه‌ره‌كیی ئه‌تۆمیی ئێران و له‌ناوی بردن، له ئێواره‌ی 24ی حوزه‌یران ئێران به كۆمه‌ڵێك مووشه‌ك هێرشی كرده سه‌ر بنكه‌یه‌كی سه‌ربازیی ئه‌مه‌ریكا له قه‌ته‌ر و وادیاره هه‌ر ئه‌مه‌ریكا خۆی رێگه‌ی به ئێران دابوو بۆ دامركاندنه‌وه‌ی تووڕه‌ییه‌كه‌ی، به‌هۆی ئه‌و زیانه زۆره‌ی به وێستگه ئه‌تۆمییه‌كانی كه‌وتبوو، هێرش بكاته سه‌ر ئه‌و بنكه سه‌ربازییه‌ی ئه‌مه‌ریكا و دوای هێرشه‌كه جه‌نگیش كۆتایی هات.
ئه‌وكات دۆناڵد تره‌مپ به میدیاكانی گوت، خۆی به‌مه رازی بووه و مووشه‌كه‌كانی ئێرانیان هه‌ر له ئاسمان ته‌قانده‌وه، ئه‌مه‌ش دووباره‌كردنه‌وه‌ی هه‌مان سیناریۆی كوشتنی قاسم سلێمانی بوو كه له ساڵی 2020 رێگه‌ی به ئێران دابوو بنكه‌ی سه‌ربازیی عه‌ین ئه‌سه‌د له عێراق بكاته ئامانج.
ماوه‌ی چه‌ند رۆژ و هه‌فته‌ی رابردوو هه‌ندێك ده‌نگۆی ئه‌وه له میدیاكان بڵاو كرایه‌وه كه فڕۆكه‌ی ئیسرائیلی، جارێكی تر به نزیك ئاسمانی ئێراندا سووڕاونه‌ته‌وه و ته‌نانه‌ت باس له‌وه كرابوو فڕۆكه‌كان چوونه‌ته ئاسمانی ئێران، به‌ڵام نه ئێران و نه ئیسرائیل هیچ زانیارییه‌كیان له‌مباره‌یه‌وه بڵاو نه‌كردووه.
ئێران له رووی هه‌ڵوێسته‌وه له هه‌ڵوێسته‌كانی رابردووی خۆی له‌باره‌ی پرسی ئه‌تۆمی و مافی پیتاندنی یۆرانیۆم پاشه‌كشه‌ی نه‌كردووه، هه‌رچه‌نده به ته‌واوی دانوستانی ئه‌تۆمی ره‌ت نه‌كردووه‌ته‌وه.
Leave a Reply