بەرپرسانی جێبەجێكار لە كەرتی دەرمان دووپات لەوە دەكەنەوە، جەنگی ئێستەی ڕۆژهەڵاتی ناوەڕاست كۆسپ و تەگەرەی گەورەی لە بەردەم گەیاندنی دەرمان بۆ وڵاتانی كەنداو دروست كردووە، ئەمەیش هەڕەشەی لەسەر تووشبووانی شێرپەنجە و نەخۆشییە ماوەدرێژەكان دروست كردووە كە بە بەردەوامی پێویستییان بە دەرمانە.
ڕۆیتەرز ڕاپۆرتێكی لەوبارەیەوە بڵاو كردووەتەوە و نووسیویەتی، گواستنەوەی دەرمان پێویستی بە ساردكەرەوە و ڕێوشوێنی تایبەت هەیە، جەنگ ئێستە ڕێگەی ئاوی پەكخستووە، بۆیە كۆمپانیاكانی دەرمان ناچارن بە ڕێگەی وشكایی دەرمان بگەیەننە وڵاتانی كەنداو.
هەرچەندە تا ئێستە حەب و دەرمانی پێویست لە كۆگەی وڵاتانی كەنداو بوونی هەیە و كەموكورییەكی ئەوتۆ دروست نەبووە، بەڵام شارەزایان نایشارنەوە كە ئەگەر جەنگەكە درێژە بكێشێ و بەردەوامی هەبێت، ئەوا كاریگەریی گەورە لەسەر كەرتی دەرمان دروست دەكات. كۆمپانیا زەبەلاحەكانی دەرمان بیر لە دۆزینەوەی چارەسەر دەكەنەوە، بۆ ئەو مەبەستەیش دەیانەوێ دەرمان بگەیەنن بە مەسقەت یان ئیستانبۆل بە فڕۆكە و لەوێشەوە بە ئۆتۆمبێل بگەیەنرێتە وڵاتانی تری ڕۆژهەڵاتی ناوەڕاست و كەنداو.
لەگەڵ ئەوەیشدا هێشتا مەترسی لەسەر حەب و دەرمان كۆتایی نایەت، ئەگەر ڕێگەی وشكاییش بدۆزرێتەوە، چونكە حەب و دەرمان پێویستی بە ساردكەرەوەی تایبەتە تا لە شوێنێكەوە بۆ شوێنێكی تر بگوێزرێتەوە، ئەمەیش ئێستە بەردەست نییە.
Leave a Reply