محمد سيامند ئيمام
لە هەرێمی کوردستاندا، سیاسی و دەسەڵاتداران بە جۆرێک مامەڵە لەگەڵ پرۆسەی سیاسی و پێکهێنانی حکومەت دەکەن کە وەک بڵێیت کات هیچ تێچوویەکی نییە و هاوڵاتییانیش خاوەنی ئارامگرییەکی بێكۆتایی و ئەفسانەیین. ئەوان لەناو کۆشکە داخراو و فێنکەکانیاندا، بەوپەڕی هێمنی و خوێنساردییەوە کاتژمێرەکان دەکوژن و بۆ چەندین مانگ لەسەر شێوازی دابەشکردنی پۆست و دەسەڵات دانوستان دەکەن، بێئاگا لەوەی کە لە دەرەوەی ئەو ژوورانە، ژیانی ڕۆژانەی خەڵک بە خێراییەکی سامناک بەرەو داڕمان دەچێت. کاتێک سەرکردەکان لەسەر مێزی گفتوگۆ یاری بە چارەنووسی وڵات دەکەن، باجی ئەم کات کوشتنە ڕاستەوخۆ دەچێتە سەر شانی ئەو کۆمەڵگایەی کە لەناو گێژاوی قەیرانەکاندا گیری خواردووە و ڕۆژانە باجی ئەو دواکەوتنە ئەنقەستە دەدات کە چینی سیاسی بۆ بەرژەوەندیی خۆی دروستی کردووە.
لەم نێوەندەدا، کاتێک دانوستانە حزبییەکان بەردەوام دەبن و هیچ ئەنجامێکیان نییە، ژیانی ڕاستەقینەی وڵات سڕ دەبێت و هەموو شتێک پاشەکشە دەکات؛ گەنجانی دەرچووی زانکۆ لەناو بێکاریدا تەمەنیان تێدەپەڕێت و خەونەکانیان دەسووتێت بێ ئەوەی هەلێکی کاریان دەست بکەوێت. خاوەن کارەکان و بازاڕەکان لەژێر فشاری داڕمانی ئابووری و ناجێگیریی سیاسیدا زیانێکی گەورە دەکەن و بەرەو ئیفلیجی دەچن. لە هەمان کاتدا، خزمەتگوزارییە سەرەتاییەکانی وەک کارەبا، ئاو، و تەندروستی ڕۆژ بە ڕۆژ وێرانتر دەبن، چونکە هیچ حکومەتێکی کارا نییە بڕیاری پێویست بۆ نۆژەنکردنەوەیان بدات.
لە هەمووشی مەترسیدارتر ئەوەیە کە ئەو بڕە کەمەی متمانەش کە لە نێوان شەقام و دەسەڵاتدا مابوو، بە تەواوی دادەڕمێت و خەڵک دەگاتە ئەو قەناعەتەی کە ئەم سیستەمە باکی بە نەهامەتییەکانیان نییە. نوخبەی سیاسی وەها مامەڵە بە کاتەوە دەکات کە وەک بڵێیت ژیانی خەڵک تەنیا ژمارەیەکە و هیچ گرنگییەکی نییە، لە کاتێکدا ئەو کاتەی ئەوان بۆ شەڕەقسە و ململانێی بێمانا بەفیڕۆی دەدەن، هەمان ئەو کاتەیە کە مرۆڤی کورد دەبوو تێیدا ژیانێکی کەرامەتداری هەبوایە. ئەمە لوتکەی گاڵتەجاڕی و بێباکیە کاتێک بەرپرسان پێیان وایە دەتوانن تا هەتایە خەڵک لە ژووری چاوەڕوانیدا بهێڵنەوە. ئەوان لەبیریان کردووە کە ئارامگریی میللەت سنووری هەیە و کاتێک قەیرانەکان دەگەنە ئێسقان، ئیتر هیچ لێدوانێکی سیاسی ناتوانێت تووڕەیی ئەو دایک و باوکانە دامرکێنێتەوە کە داهاتووی منداڵەکانیان لەناو ئەم یارییە سیاسییە بێزارکەرەدا دۆڕاندووە. تا ئەو کاتەی دەسەڵاتداران واز لەم یاریی کات کوشتنە نەهێنن، کوردستان بەردەوام دەبێت لە لەدەستدانی باشترین ساڵەکانی تەمەنی خۆی
Leave a Reply