بەختیار جەزا جەلال
دوو قومارچی لەسەر مێزێکی سووتاو دادەنیشن و بەوپەڕی دڕندەییەوە لەسەر موڵکێک گرەو دەکەن کە خەریکە بە تەواوی دەبێتە خۆڵەمێش، بێئاگا لەوەی کە خاوەن قەرزەکان لە دەرگایان داوە بۆ داگیرکردنی تەواوی ماڵەکە. ئەمە ڕاستیی تاڵی سیاسەتی ئەمڕۆی هەرێمی کوردستانە. مشتومڕی ڕاستەقینە لەسەر ئەوە نییە ئایا کێبڕکێی سیاسی لەم هەرێمەدا بوونی هەیە یان نا، چونکە ئەوەی دەیبینین کێبڕکێ نییە لەسەر خزمەتگوزاری و باشترکردنی ژیانی خەڵک، بەڵکو شەڕێکی کوێرانەیە بە چارەنووسی نیشتمانەوە. پرسیارە کارەساتبارەکە ئەوەیە کە ئایا دوژمنایەتیی حزبی هێندە پیرۆزتر بووە لە یەکڕیزیی نەتەوەیی و گەشەپێدانی دامەزراوەکان، کە ئیتر تەواوی هەرێم بووەتە قوربانیی گرەوی دوو دەسەڵاتی قۆرخکار؟
بۆ دەسەڵاتداران، سەرکەوتن واتە زەوتکردنی زۆرترین پۆست و قۆرخکردنی داهاتی خاڵە سنوورییەکان. پرسیاری گرنگ ئەوە نییە کێ لەم دانوستانانەی داهاتوودا کورسییەک زیاتر دەباتەوە، چونکە لە ڕاستیدا هەر کاتێک ئەم دووبەرەکییە ناوخۆییانە دەگۆڕێن بۆ قەیرانی ئاشکرا، تەنیا یەک دۆڕاو هەیە: پێگە و هێزی دانوستانی کورد. هەر جارێک کە پارتی و یەکێتی ناکۆکییەکانیان دەبەنە دەرەوە و دەیکەنە قەیرانێکی گشتی، بەغدا و وڵاتانی هەرێمی بە زەردەخەنەیەکەوە سەیریان دەکەن و دەزانن کە ئێستا باشترین کاتە بۆ ئەوەی بە هەرزانترین نرخ، دەستکەوت و کارتی فشاریان لێ زەوت بکەن.
(کاتێک فەیلەسوف و شاعیر جوبران خەلیل جوبران دەڵێت: “هاوار بۆ ئەو نەتەوەیەی پارچە پارچە بووە، و هەر پارچەیەکیش خۆی بە نەتەوەیەک دەزانێت”) — ئەمەش ڕێک هەمان ئەو تراژیدیایەیە کە لە سەردەمی شەڕی ناوخۆی لوبنان ڕووی دا، کاتێک کە سەرکردە میلیشیاکان وڵاتەکەیان کردە چەند کانتۆنێکی دابەشکراو و هەر یەکەیان خۆی بە دەوڵەتێک دەزانی، تا ئەوەی وڵاتیان بە تەواوی خستە ژێر ڕکێفی بێگانەوە. بەڵام ئەم دەسەڵاتدارانەی ئێمە، هەمان ئەو پارچەبوونە وێرانکەرە بە ناوی “فرەڕەنگیی سیاسی” و “تەوازونی هێز” بەسەر میللەتدا دەسەپێنن و نیشتمانیان کردووەتە پاشکۆی ئەجێندای دەرەکی.
لە جیاتی ئەوەی دامەزراوەی نیشتمانیی ڕاستەقینە و سوپایەکی یەکگرتوو دروست بکەن بۆ ڕووبەڕووبوونەوەی مەترسییەکان، ئەوان خەریکی گەورەکردنی ئابووری سێبەر و بەهێزکردنی سەرمایەداری دڕندەن بۆ لاوازکردنی یەکتری. ئەوان باکیان بەوە نییە کە دامەزراوەکانی هەرێم بوونەتە دادگای کارتۆنی و فەرمانگەی بێدەسەڵات؛ ئەوەی بۆ ئەوان گرنگە ئەوەیە کە کام لایەن دەتوانێت کۆنترۆڵی زیاتری بەسەر سامانی گشتیدا هەبێت. لەم یارییەدا، نیشتمان بووەتە کاڵایەکی بێبەها کە هەموو ڕۆژێک لە مێزی دانوستانەکاندا پارچەیەکی لێ دەفرۆشرێت تا دەسەڵاتی بنەماڵە و کۆمپانیا حزبییەکان پارێزراو بن.
ململانێی ئەوان لەسەر ئێوە و مافەکانتان نییە، بەڵکو شەڕی گورگەکانە لەسەر کەلاکی نیشتمانێک کە خۆیان وێرانیان کردووە. ئەوان بە ئەنقەست قەیرانە ناوخۆییەکان دەتەقێننەوە بۆ ئەوەی ئێوە هەمیشە سەرقاڵی پرسی پارچەبوون بن و داوای مافی ڕاستەقینەی خۆتان نەکەن. بێدەنگیی ئێوە، مۆڵەتێکی کراوەیە بۆ ئەوەی ئەوان لە بەردەم بێگانەدا کەرامەت و هێزی نەتەوەیەک هەڕاج بکەن؛ با ئیتر ئەم شانۆگەرییە ڕەت بکەینەوە، چونکە ئەو حیزبانەی کە نیشتمان لە پێناو مانەوەی خۆیاندا پارچە دەکەن، هەرگیز نابنە پارێزەری کەرامەتی ئێوە!
Leave a Reply