بنیامین نه‌ته‌نیاهۆ سه‌رۆك وه‌زیرانی ئیسرائیل به فه‌رمی داوای له سه‌رۆك كۆماری وڵاته‌كه‌ی كرد، به بڕیارێك لێبوردنی بۆ ده‌ربكات بۆ ئه‌وه‌ی بتوانێ باشتر ئه‌ركه‌كانی خۆی راپه‌ڕێنێت.
ئه‌و ئاماژه‌ی داوه ئه‌گه‌ر لێبوردنی بۆ ده‌ربكرێت، ئه‌وا سوودێكی زۆری بۆ ئیسرائیل ده‌بێت، له‌لایه‌ك كۆتایی به‌و ناكۆكییه ناوخۆییانه دێت كه درزی خستووه‌ته ناو كۆمه‌ڵگه، له‌لایه‌كی تریش ده‌بێته هۆكاری ئه‌وه‌ی ته‌واوی توانا و وزه‌ی خۆی بۆ پاراستنی ئیسرائیل و دوورخستنه‌وه‌ی مه‌ترسییه‌كان له‌سه‌ر وڵاته‌كه‌ی ته‌رخان بكات.
بنیامین نه‌ته‌نیاهۆ گوتوویه‌تی، ده‌زانێت ئه‌گه‌ر دادگاییش بكرێت، ئه‌وا دۆسیه‌كه ده‌باته‌وه و ئه‌گه‌ر مه‌به‌ستی قازانجی كه‌سی بوایه، ئه‌وا حه‌زی ده‌كرد رێوشوێنه‌كانی دادگاییكردن درێژه‌یان پێ بدرێت، به‌ڵام خۆی به‌رژه‌وه‌ندیی نیشتمانی لا مه‌به‌سته و ده‌یه‌وێت هه‌رچی زووه له پێناو چه‌سپاندنی ئاشتی و كۆتاهێنان به‌و ناكۆكییانه، كۆتایی به دۆسیه‌كه‌ی بهێنرێت.
پێویسته بگوترێ كاتێك دۆناڵد تره‌مپ سه‌ردانی ئیسرائیلی كرد، له په‌رله‌مانی وڵاته‌كه‌وه داوای له سه‌رۆك كۆمار كردبوو له بنیامین نه‌ته‌نیاهۆ ببوورێت و كاتێكیش گه‌ڕایه‌وه ئه‌مه‌ریكا، جارێكی تر ئه‌م داوایه‌ی لێ كرده‌وه.
Leave a Reply