بڕیارە پێش سەری ساڵ ئەمەریكا لە هەولێر كونسوڵگە گەورەكەی بكاتەوە، بەپێی زانیارییەكان مایكڵ ریاگس جێگری وەزیری دەرەوەی ئەمەریكا و مارك ساڤایا نوێنەری سەرۆك ترەمپ بەشداریی لە كردنەوەیدا دەكەن.
نووسەر و توێژەری دیاری كورد د. سەردار عەزیز رای گەیاند، دوای چەند جارێك دواخستن، ئەمەریكا لە ڕۆژانی داهاتوودا كونسوڵگە نوێكەی لە هەولێر دەكاتەوە.
ئەوەشی گوتووە، لە ڕۆژانی داهاتوودا Michael Rigas لە توركیاوە دەگاتە بەغدا و پاشان سەردانی هەولێر دەكات و كونسوڵگەكە دەكاتەوە.
هاوكات ساڤایاش رای گەیاندووە، لە ماوەی داهاتوودا سەردانی هەرێمی كوردستان و عێراق دەكات. بەبڕوای چاودێران بەشێك لە سەردانەكەی ساڤایاش بۆ كردنەوەی كونسوڵگەكەی ئەمەریكایە لە هەولێر.
كونسوڵگەكە بڕی 800 ملیۆن دۆلاری تێچووە. دواین جار پلانی كردنەوەی دانرا، پیاداچوونەوە بە كونسوڵگەكەدا كرا تا جێگەی زیاتری كارمەندانی تیادا بێتەوە، ئەمەریكا بەكردنەوەی كونسوڵگەیەكی وا لە كوردستان دەریدەخات، دەیەوێت بەقەبارەیەكی گەورەتر لە هەرێمدا كار بكات و پێوەندییەكانی فراوانتر بكات.
رۆژی چوارشەم 26ـی تشرینی دووەمی 2025، مەسروور بارزانی سەرۆكی حكوومەتی هەرێمی كوردستان، لە كۆنگرەیەكی ڕۆژنامەوانیدا ڕای گەیاند، كردنەوەی گەورەترین كۆنسوڵگەی ئەمەریكا لە هەولێر، ئاماژەیەكی ڕوونە لەسەر ئەو پێوەندییە باشەی كە لە نێوان هەرێمی كوردستان و ئەمەریكادا هەیە.
Leave a Reply