وه‌زاره‌تی پلاندانانی عێراق دابه‌زینی رێژه‌ی هه‌ڵاوسان بۆ مانگی تشرینی دووه‌می ئه‌مساڵی راگه‌یاند و ئاماژه‌ی به‌وه كردووه، جگه له هه‌ڵاوسانی مانگانه هه‌ڵاوسانی ساڵانه‌ش دابه‌زیوه.
عه‌بدولزوهره هینداوی گوته‌بێژی وه‌زاره‌تی پلاندانانی عێراق ئاماژه‌ی داوه، رێژه‌ی هه‌ڵاوسان له پارێزگاكانی عێراق به تێكڕا له‌چاو مانگی ئه‌یلوول به رێژه‌ی 0.3% دابه‌زیوه.
ئه‌و روونی كرده‌وه، هه‌ڵاوسانی ساڵانه‌ش به رێژه‌ی 0.5% دابه‌زیوه. مه‌به‌ست له هه‌ڵاوسانی ساڵانه بریتییه له جیاوازیی رێژه‌ی هه‌ڵاوسانی مانگی تشرینی یه‌كه‌می ئه‌مساڵ به‌راورد به هه‌مان ماوه‌ی ساڵی رابردوو.
وه‌ك خستوویه‌ته روو یه‌كێك له هۆكاره سه‌ره‌كییه‌كانی دابه‌زینی رێژه‌ی هه‌ڵاوسان، بۆ كه‌مبوونه‌وه‌ی نرخی خۆراك و خواردنه‌وه به رێژه‌ی 0.5% ده‌گه‌ڕێته‌وه، جگه له‌مه نرخی ماسی به رێژه‌ی 4.9% و میوه به رێژه‌ی 2.4% دابه‌زیوه. هاوكات نرخی شوێنی نیشته‌جێبوونیش به رێژه‌ی 1% پاشه‌كشه‌ی كردووه.
پێویسته بگوترێ دابه‌زینی رێژه‌ی هه‌ڵاوسان، هێمایه بۆ ئه‌وه‌ی خه‌ڵك بۆ دابینكردنی پێداویستییه سه‌ره‌كییه‌كانی ژیانیان، پاره‌ی زیاتر له رابردوو ناده‌ن و ئه‌مه‌ش هێمایه بۆ ئابوورییه‌كی سه‌قامگیر له وڵات.
سلێمان
Leave a Reply