سه‌رۆكی رێكخراوی لێبوردنی نێوده‌وڵه‌تی، هه‌ڵوێستی خۆی له‌باره‌ی سووریای نوێ و گۆڕانكارییه‌كانی دوای رووخانی رژێمی ئه‌سه‌د راگه‌یاند و گوتی، ده‌سه‌ڵاتی نوێ پابه‌ندیی خۆی بۆ ئه‌نجامدانی چاكسازی و ئاشتی و دادپه‌روه‌ری راگه‌یاندووه كه ئومێدبه‌خشن، به‌ڵام تا ئه‌م ساته له‌و وڵاته‌دا شتێك به ناوی دیموكراسی نییه.
ئێگنێس كالامار سه‌رۆكی رێكخراوی لێبوردنی نێوده‌وڵه‌تی كه له چه‌ند رۆژی رابردوودا سه‌ردانی دیمه‌شقی كرد، له نزیكه‌وه وڵاته‌كه‌ی به‌سه‌ر كرده‌وه و به ئاسۆشێتدپرێسی راگه‌یاندووه، گۆڕانكاری به‌سه‌ر سووریادا هاتووه، چونكه كۆمه‌ڵێك پلان بۆ هه‌مواركردنی یاساكان له په‌رله‌مان خراونه‌ته روو و پێشوازیی له رێكخراوه‌كانی جیهانی بۆ بواری ئاشتی و مافی مرۆڤ كراوه، هه‌موو ئه‌و گۆڕانكارییانه‌ش شتی باشن، به‌ڵام زۆر بچووكن.
ئه‌و روونی كرده‌وه، وه‌زیری دادی سووریا پێی گوتووه سه‌تان كه‌س له پێوه‌ندیی له‌گه‌ڵ رژێمی پێشوو له گرتووخانه‌كانی سووریا راگیراون، بۆیه‌ش پرسیاری ئه‌وه‌ی كرد كێ ئه‌وانه دادگایی ده‌كات و له‌سه‌ر چ بنه‌مایه‌ك راگیراون.
كالامار پێی وایه چوارچێوه‌ی یاساكان زۆر به خێرایی ده‌بێت بگۆڕێن، چونكه هێشتا هه‌ندێك تاوانی نێوده‌وڵه‌تی هه‌ن هێشتا له سووریا هه‌ر به تاوان حیساب ناكرێن.
سه‌رۆكی رێكخراوی لێبوردنی نێوده‌وڵه‌تی به پێویستی زانی كۆمه‌ڵگه‌ی نێوده‌وڵه‌تی بڕیاری توند و گرنگ بدات، گوێ له خه‌ڵكی سووریا و ویست و داخوازییه‌كانی گۆڕانكاری بگرێت.
Leave a Reply