بۆ هەموو ئەوانەی دەیانەوێ بە تەندروستییەكی باش و زیاتر بژین، پێویستە بایەخ بە سیستمی خۆراكی خۆیان بدەن و رۆشنبیریی ئەوەیان هەبێت كە چۆن تەندروستییان دەكەنە سەرووی هەر پێویستییەكی ژیان. بۆیە پسپۆرانی بواری خۆراك ئاماژە بە هەندێك خۆراك دەدەن كە بە خواردنیان، دەتوانن زیاتر لە 100 ساڵ بژین.
بەشی تەندروستیی پێگەی “شەرق ئەوسەت”، هەواڵەكەی لە پێگەی “هێڵس” وەرگرتووە كە پسپۆرانی بواری خۆراك قسەیان بۆ كردووە. ئەوان ئامۆژگارییان بۆ مرۆڤ بەشێوەیەكی گشتی و لە هەر تەمەنێكدا بن دەخەنەڕوو، بەتایبەتیش بۆ كەسانی بەساڵاچوو، جیالەوەی سیستمی خۆراكیی زۆرباش دەخەنە بەرچاو بۆ تەندروستییەكی باشتر، هاوكات هۆشداریی دەدەن بۆ كەمكردنەوەی بەرهەمە شیرمەنییەكان و گۆشتی سوور و شیرینەمەنییەكان، دووركەوتنەوە لەو خۆراكانە تەمەنی مرۆڤ درێژتر دەبێت.
لەبارەی خۆراكە بەسوودەكان باس لە فاسۆڵیا و پاقلەمەنییەكان كراوە كە بە پرۆتین و ریشاڵ و ڤیتامینەكان دەوڵەمەندە. فاسۆڵیا رۆڵی هەیە لەپارێزگاریی ئاستی شەكر لە خوێندا. هەروەها ئەركی هەرس باشتر دەكات. دواتریش كۆلیسترۆڵ لە خوێن كەمتر دەكاتەوە و بەوەیش دڵ لە نەخۆشییەكان دەپارێزێت.
هەروەها سەوزە گەڵادارەكان وەك سپێناخ و سڵق و كاهوو و سەوزە گەڵادارەكانی تر، ئەو خۆراكە دەوڵەمەندە بە ڤیتامین و ریشاڵ كە رۆڵی بۆ كەمكردنەوەی هەوكردن هەیە، هەروەها بەرگریی جەستە بەهێزتر دەكات و تەندروستیی دڵ دەپارێزێت. هەروەها چەرەزاتیش بە خۆراكێكی سوودمەند ناو براوە وەك گوێز و بادەم و فستق و ئەوانی تر، چونكە جیالە پرۆتین، هاوكات چەرەزات چەوریی تەندروست لەخۆ دەگرن، هەروەها ڤیتامینی زیاتر.
خۆراكە دانەوێڵەییەكان كە پێوەندیی راستەوخۆیان بە تەندروستیی كەسانی بەساڵاچوو هەیە، وەك گەنم و برنجی بۆر و ئەوانی تر كە سەرچاوەی باشن بۆ كاربۆهیدرایت، هاوكات دەوڵەمەندن بە ریشاڵ و رەگەزە خۆراكییەكانی تر، ئەوەیش ئاستی شەكر لە خوێندا رێكدەخات و كۆلیسترۆڵی خراپ كەمتر دەكاتەوە. بەدوایدا زەیتی زەیتوونیش یەك لە خۆراكە زۆرباشەكانە، ئەوەیش بۆ تەندروستی دڵ رۆڵی گەورە دەبینێت و كۆلیسترۆڵی خراپ لە جەستەدا ناهێڵێت و دەمارە خوێنییەكان بەهێزتر دەكات و دەیانپارێزێت.
پەتاتەی شیرینیش خۆراكێكی زۆرباشە بۆ تەندروستی بەتایبەتی بۆ بەساڵاچووان، چونكە سەرچاوەیەكی باشی كاربۆهیدرایت و ریشاڵە، بۆیە وزەی زیاتر بە مرۆڤ دەبەخشێت، هەروەها ئەو دژەئۆكسیدەی لەناو پەتاتەی شیریندا هەیە، رۆڵی هەیە بۆ لەناوبردنی هەوكردن. لەگەڵیدا باس لە خۆراكە دەریاییەكان دەكرێت كە بە پرۆتین دەوڵەمەندن، ترشەڵۆكی ئۆمیگا3 لەخۆ دەگرن كە بۆ تەندروستیی مێشك زۆرباشە، هەوكردن لە جەستە كەمتر دەكاتەوە و دواتریش دڵ لە نەخۆشییەكان دەپارێزێت.
دواتریش میوەكان خۆراكی ترن كە ڤیتامینە سەرەكییەكان لەخۆ دەگرن، لەگەڵ ریشاڵ و دژەئۆكسید كە هەموو ئەوانە بۆ تەندروستیی گشتی زۆر بەسوودن. دوای ئەوەی باس لە چای و بەتایبەتی چای سەوز كراوە كە بۆ تەندروستی زۆر بەسوودە.
بە بایەخدان بەو خۆراكانەی لە سەرەوەدا ئاماژەمان پێ كردوون، ئەگەر بتانەوێ بە دروستی بەو سیستمە خۆراكییە پابەند بن، تەمەن بۆ زیاتر لە 100 ساڵ درێژ دەكاتەوە.
Leave a Reply